غزل ۔۔۔۔ ابراہیم اشک
چاند بھی روشن مرے زخمِ درخشاں سے ہوا
آبروٸے خوبیءِ عالم دل و جاں سے ہوا
عزم تھا دیدار کا جو جان لب پر آ گٸی
حادثہ یہ بھی مرے ہی دل کے ارماں سے ہوا
سارا عالم مست و بے خود ہو گیا ہے کس لٸے
لوگ کہتے ہیں کہ سب زلفِ پریشاں سے ہوا
کس نے پایا چین تیری اک نظر کے سامنے
دین و ایماں سب لٹانا تیرے مستاں سے ہوا
خواب آلودہ مری آنکھیں بھی روشن ہو گٸیں
نور کا چھڑکاٶ جو روٸے درخشاں سے ہوا
اپنے رخ کا ایک گل دستہ صبا کے ساتھ بھیج
مہرباں کچھ آج موسم خاک بستاں سے ہوا
کوٸی بھی پہنچا نہیں اس منزلِ مقصود تک
سلسلہ یہ عشق کا اٸے جانِ من جاں سے ہوا
آج پھر دل میں خرابی ہے کہ یار آنے کو ہے
یہ بھی اک احساس مجھ کو زخمِ پنہاں سے ہوا
ایک میں ہی ہوں جسے دار و رسن کا ڈر نہیں
دینِ حق روشن ہوا تو میرے ایماں سے ہوا
اس سے پہلے سارا عالم دیر تک سنسان تھا
ایک ہنگامہ جہاں میں بزمِ رنداں سے ہوا
استفادہ کچھ کیا ہے اشک حافظ سے مگر
شعر تو رنگین اپنا دردِ جاناں سے ہوا